Saemien Sïjten våarhkoe

Saemien Sïjte aalkovistie eadtjohke barkeme saemien siebriedahkem jeatjabidie vuesiehtidh jïh dan bïjre soptsestidh. Saemien Sïjte sïjhti aerpieguedtiejidie eevtjedh saemien vuekide jïh gïelem nænnoestin jïh kultuvrebyjreskidie ohtsedidh jïh dejtie vaarjelidh.  

Jaepieh 1985 – 1989 Saemien Sïjte prosjektem darjoeji, åarjelsaemien kultuvremojhtesidie jïh kultuvrebyjreskidie abpe åarjelsaemien dajvesne (Raanen tjïelten raejeste jïh Rendalen tjïelten raajan) ohtsedin jïh dej bïjre tjaeliestin jïh dejtie guvviedin. Daelie medtie 3100 tjaalegh våarhkosne kultuvrebyjreski bïjre. 

 

Kultuvrehisovrijen våarhkoe 

Saemien Sïjten våarhkosne medtie 750 daeverh. Jeenemes daeverh våarhkose böötin vadtesinie. Saemien Sijte 160 daeverh Norsk folkemuseumisitie jïh Kulturhistorisk museumistie Bååstede-prosjektesne åadtjoeji.  

Saemien Sïjte aaj båeries guvvieh tjöönghkeminie. Saemien Sïjte tuhtjie dïhte barkoe vihkele. Daelie medtie 2500 guvvieh tjöönghkeme. Gosse guvvieh Saemien Sïjtese båetieh, dellie dejtie digitale våarhkose guelmiedehtieh jïh PRIMUS-ese tjöönghkieh. Dellie Saemien Sïjte maahta guvvide gaskeviermesne vuesiehtidh. Vihkele daejredh gïeh almetjh båeries guvvesne leah. Saemien Sïjte aaj jeatjah museumh, institusjovnh jïh almetjh viehkehte. 

Jaepien 2009 Saemien Sïjte eelki digitale baanth jïh ovmessie tjoejenasse-vierhtieh gaskevearman tjöönghkedh. Daelie maehtebe dejtie vierhtide goltelidh. Almetjh radiovisnie jïh intervjuvine soptsestamme. Desnie aaj ovmessie learoevierhtieh.  

Saemien Sïjten våarhkosne tjaalegh saemien siebriedahken bïjre. Desnie ovmessie gaaltijh, vuesiehtimmien gaavhtan: tjaalegh kultuvremojhtesi bïjre, boelhketjh plaerijste jïh tjaalegh intervjuvijste. Saemien Sïjte eelki jaepien 1964 ovmessie tjaalegh tjaaleldh-våarhkose tjöönghkedh.   

 

Gærjagåetie jïh gærjavåarhkoe 

Saemien Sïjte lea gærjah vadtesinie åådtjeme jallh gærjah gærjagåatan åasteme. Jaepien 2004 Saemien Sïjte gellie gærjah vadtesinie Kjell Haarstad-en luvhtie åadtjoeji. Jaepien 2008 gellie gærjah Bjørn Aarset-en luvhtie åadtjoeji. 

 

Gåetie-vaarjelimmie 

Jaepien 1979 Saemien Sïjte John Eliassen-en buvriem öösti. Buvrie Gressamo-esne, Låarten sïjtesne årroeminie. Buvriem orrestehtin jaepien 1980. Gressamo-esne aaj gåetie gusnie bearkoe soevestin. Dam jaepien 2007 orrestehtin. 

Jaepien 1988 buvriem Arvassli-este Saemien Sïjtese bööktin. Jaepien 1995 buvriem Saemien Sïjtese tseegkin.