Buerie båeteme virtuelle veartenen sïjse jïh eevre sjïere vuesiehtæmman!

Vuesiehtimmesne «Gaskelaante – Grenseland» daajbaaletje digitaale teknologije åtnasåvva bievniemisnie åarjelsaemien kultuvreaerpeste mij håvhtadamme klijmajarkelimmijste.

Tsaekieh VR-prælloeh jïh tjaangh sjïere digitaale vuesiehtimmien sïjse, gusnie maahtah 3D-skannadamme museumedaeverh dovne vuejnedh jïh gïetedidh.

Mænngan daevieridie goerehtamme maahtah guhkiebasse vaedtsedh virtuelle oksen tjïrrh. Dunnie bielesne datne daelvielaantese Hansmyran lïhke båatah, akte dajve sveerjen raasten lïhke Verdalen tjïeltesne. Daan biejjien Hansmyra lea bielie Gaskelaanten sïjteste, mij lea raastedajvesne Trööndelagen jïh Jïemhten gaskesne. Daennie dajvesne arkeologh aadtjen gïejh gaavneme saemieh desnie hööltestamme vielie goh 1000 jaepiej juassah.