Vuestiehtimme «Båatsoe tjååhpehkisnie jïh vyölkehkisnie» Nils Thomassonen guvviejgujmie rïhpeste goevten 6. b Saemien Sijtesne.

nils thomasson

Nils Thomassonen fotografiske aerpie vadtasovvi Stiftelsen Jamtlise jïh destie daelie dejtie 30.000 guvvide stuvrelgi, soptsesinie, evtemes saemiej jieliemistie Nils Thomasson tïjjeste.

Gosse Staare 2018 heevehti dam voestes saemien tjåanghkoem 1918, Nils jïh Lucia Thomassonen slïektesiebrie veeljeme Jamtlin jïh Stiftelsen Saemien Sïjten ektine Snåasesne dam vuaptastehtedh vuesiehtimmine «Båatsoe tjååhpehkisnie jïh vyölkehkisnie». Nils Thomassonen guvviejgujmie.

Gosse Thomassonen aerpiem guvvijste vuesiehtidh dellie daerpies veeljedh maam edtja vuesiehtidh jïh daan aejkien mijjieh bovtsh jïh båatsoem veeljeme. Nils Thomasson lij bovtseburrie jïh jïjtje meatan ryöjnesji. Veele damti dejtie mejstie guvvieh veelti. Vuesiehtimmesne barkoem giedteste vuesehte gosse mieside mïerhkesjin jïh buhtjin, bovtsh vaeresne jïh reajnoemaennien aarkebiejjeste gosse tjöönghkin, juhtiejin, lïegkedin jïh dagkerh. Tjoerin bovtside ryöjnesjidh jïh våårenassh lin reajnoemaenniej aarkebiejjie, dannasinie röövrine daerpies.

Båatsoe aaj jieleme fualhkan jïh maanah meatan viehkiehtin jïh aareh lïerin guktie dåemiedidh. Vuesiehtimmesne aaj guvvieraajroe gustie veeljeme gaajhkijste guvvijste maam Nils Thomasson maanijste vaalteme: maanah gïeh bovtsh stååkedieh, maanah reajnoemaennine jïh learohkh juhtijeskuvline.

Beetnehvierhtieh vuesiehtæmman åådtjeme
Jïemhten Herjedaelien dajveste jïh Saemiedigkeste Sveerjesne

 

Nils Thomasson

Nils Thomasson (1880-1975) fotograafe, bovtseburrie, entreprenööre jïh saemie. Fotograafine Tjarvetjisnie (Gävle) ööhpehti jïh 1900-jaepiej aalkoevistie meehti sov vierhkine aelkedh. Thomasson dellie, guktie jeenh fotograafh 1900-jaepiej aalkoevisnie, bïjre jarkan dennie jïjtse voenesne mïnni jïh måedtie fotografiske barkoe darjoeji. Jïjtje soptsesti guktie aalkoevisnie utni sov lådkamera kassedtigujmie, göökte plååtine fïerhtene kassedtesne. Gosse njieljie guvvieh vaalteme tjoeri akten tjeallarasse tjaangedh, gusnie eevre jemhkelde jïh desnie vihth orre plååth kassedtide bïejedh. 1910-jaepiej gaskeste Nils Thomasson jïjtse vierhkiem Ååresne utni, gåaph jaepien 1916 elties fuelhkine juhtieji.

Vaeriefotograafine Nils Thomasson abpe Sveerjesne åehpies, jïh dovne ålkoerïjhkesne. Meatan orreme gelline Svenska Turistföreningenen jaepiegærjine jïh dovne guvvieh veelti maam almetjh dongkeme jïh guvvieh jïjtje mïelen mietie. Guvviej tjïrrh Thomassonen dam aareh turismem, båantaj jïh saemiej jielemem Jïemhtesne joekoenlaakan vïhtesji. Ij barre saemiej jieleme sutnjien vihkeles orreme, guvviejgujmie abpe Jïemhten leenem vïhtesji, gosse sjïelelaejpieh bååhkesjin, guktie sïeterinie, skåajjebarkijh, duarpehkh, stuarah (turisth) Ååren bergbanan baalte, hïejh jïh aarkebiejjie. Seamman aejkien Nils Thomasson lij reajnoemaennie jïh bovtsenbearkojne åesiesti jïh vaaroeh bovtseste. Gosse Staare 2018, tjuetiejaepien heevehtimmiem utni, dehtie voestes saemien rïjhketjåanghkoste, dellie aaj måjhtajidh Nils Thomasson lij meatan daennie voestes tjåanghkosne. Aaj meatan jeatjene lehkesne jïh saemiej gaavhtan barki.

Nils Thomasson; Jamtli
Nils Thomasson

Dïhte mij joekoen Nils Thomasson voenefotograafine lij evtemes saemie jïh saemien seabradahken lïhke lij jïh barkoem åadtjoeji, guvvieh saemijste vaeltedh bïjre jarkan dennie Jïemhten Herjedaelesne. Dejnie 30.000 guvvine mah aajmojne Thomasson mænngan gellie guvvieh mah saemide, saemiej jielemem jïh saemiej fuelhkide vïhtesjieh. Daesnie aaj gellie guvvieh vaeriebyjresistie jïh bovtsijste gååvnesieh.

Jamtli göökte gærjah Nils Thomassonen bïjre buakteme, Jämten 1981 jïh Samefotografen Nils Thomasson, Jon E Utsi, 1997.

 

Her kan du lese om utstillingen på norsk.